ۇلى دالانىڭ باتىرلىق بەينەسىن ناسيحاتتاپ, قازاقتىڭ ەتنو-ويىندارىن دارىپتەۋ ماقساتىندا ۇيىمداستىرىلاتىن بۇل دوداعا ەلىمىزدىڭ ءار وڭىرىنەن ارنايى ىرىكتەلگەن اتان جىلىك, ءاپايتوس, جاۋىرىنى قاقپاقتاي, ناعىز الىپتار قاتىسادى.
تۋرنير بارىسىندا باتىرلار جەتى ءتۇرلى سىننان وتەدى. ولاردىڭ ىشىندە سالماعى 100 كەلىلىك سەركەنى كوتەرۋ, 150 كەلى تارتاتىن بورەنەنى جەلكەگە سالىپ وتىرىپ-تۇرۋ, شامامەن 1 توننا جۇك ارتىلعان اربانى مولشەرلى ۋاقىت ىشىندە قاشىقتىققا سۇيرەۋ, بىلەك قارىمىن سىناپ قىلىشتى شىدامدىلىققا كوتەرۋ, 100 كەلىلىك تاستى مەجەلى قاشىقتىققا دەيىن اپارۋ, اۋىر سالماقتاعى گىر تاسىن كوتەرۋ جانە ۇزىندىعى 1,5 مەتر بولاتىن تەمىردى مويىنعا سالىپ ءيىپ مايىستىرۋ سىندى ەرەكشە سايىس تۇرلەرى بار.
«اتالعان سايىستى استانا قالاسى اكىمدىگىنىڭ قولداۋىمەن ەلوردا تورىندە ءۇشىنشى مارتە وتكىزگەلى وتىرمىز. جارىستىڭ اشىلۋ سالتاناتى 6 شىلدە كۇنى ساعات 16:00-دە باستالادى. بارشا ۇلتتىق سپورت جاناشىرلارى مەن قالا تۇرعىندارىن وسى ءدۇبىرلى دوداعا كەلىپ, الىپتارعا قولداۋ كورسەتۋگە شاقىرامىز. كورەرمەندەر ءۇشىن كىرۋ تەگىن. سونىمەن بىرگە «ارعىماق» كەشەنىنە №303, №309 جانە №323 باعىتتارىنداعى اۆتوبۋستار قاتىنايدى», دەيدى جوبانىڭ اۆتورى ءارى ۇيىمداستىرۋشىسى تيمۋر سپاتاەۆ.
